Les Siswa Laura - Bahasa Daerah Bali

I. Pangenter Acara

Pangenter Acara yen ring Basa Indonesia kabaos Pembawa Acara. Ring Basa Inggris kabaos Master of Ceremony sane kacutetang dados MC. Pangenter Acara inggih punika jadma sane ngwedarang indik dudonan (eedan) acara sajeroning acara sane kalaksanayang.

Pateh sakadi tata cara makarya pidarta, ring sajeroning makarya teks pangenter acara patut taler kaelingang tur kauningin, sane kaanggen titi pengancan makarya teks pangenter acara inggih punika :

1. Tema

Tema inggih punika unteng pikyunan.

2. Pamahbah

Pamahbah utawi pendahuluan patut madaging :

a. Pujastawa, sane ketahnyane nganggen puja pangastungkara.

b. Matur pangayubagianing manah utawi penghormatan sakadi kruna : kasuciang, kasinggihang, wangiang, kusumayang, mustikayang, baktinin, tresnasihin nganutin linggih, panyuksma, miwah swasti prapta ring sang sane sida rauh ring sajeroning acara.

3. Daging Acara utawi isi

Dudonan acara sane jagi kalaksanayang.

4. Pamuput Acara

Pamuput Acara madaging indik :

a. Panyuksma antuk uratian sang sane miragiang, sang sane sida rauh, miwah sane nagingin acara.

b. Atur pangampura antuk sahanan kakirangan rikala maktayang acara.

c. Pamuput atur, sane ketah nganggen paramsantih.

_____________________________

II. Model Pangantar Acara

Unteng pangenter acara nenten ja sios wantah sang sane nuntun rikala wenten acara resmi utawi acara kanegaraan. Ring sajeroning kawentenan acara, acara sane kabaktayang taler akeh. Wenten acara sane marupa iburan, acara radio, acara televisi, miwah acara seminar. Mawinan asapunika kawentenan wastan pangenter acara taler matiosan-matiosan sakadi :

a. MC (Master of Ceremony)

Istilah pangenter acara puniki ketah kaanggen rikalaning ngemargiang acara resmi utawi nenten resmi sakadi acara hiburan.

b. Presenter (HOST)

Istilah pangenter acara puniki ketah kaanggen rikalaning ngwedarang acara ring media televisi.

c. Penyiar

Istilah pangenter acara puniki ketah kaanggen rikalaning ngwedarang acara ring radio.

d. Moderator

Istilah pangenter acara puniki ketah kaanggen rikalaning ngwedarang acara pabligbagan.